Ish-presidenti i Kosovës, Hashim Thaçi është vizituar këtë të premte nga prindërit e tij, në Hagë.

Dy të moshuarit dhe anëtarë të tjerë të familjes Thaçi kanë hyrë në qendrën e paraburgimit, ku ndodhet Thaçi dhe ish-komandantët e tjerë të Ushtrisë Çlirimtare të Kosovës (UÇK).

Takimi i Thaçit me prindërit e tij ka zgjatur rreth 6 orë. Për herë të fundit, ish-kreu i shtetit të Kosovës ishte takuar me ta në nëntor të vitit 2020.

Më 10 maj të vitit 2022, Thaçi u paraqit në seancën e radhës në Gjykatën Speciale në Hagë, pasi më 29 prill 2022, Zyra e Prokurorit Special ka dorëzuar aktakuzën e ndryshuar ndaj tij.

Që nga nëntori i vitit 2020, Hashim Thaçi, Kadri Veseli, Rexhep Selimi dhe Jakup Krasniqi    gjenden në paraburgim në Hagë dhe janë deklaruar të pafajshëm për akuzat që rëndojnë ndaj tyre.

Në dokumentin e dorëzuar nga organi i akuzës në Gjykatën e Hagës, ata akuzohen se u kanë hequr lirinë të paktën 12 personave në periudhën 4 korrik 1998-29 prill 1999.

Akuza ndaj tyre për krime lufte shtrihet midis marsit të vitit 1998 dhe shtatorit të vitit 1999.

LEXONI GJITHASHTU

• Thaçi në Gjykatën Speciale: Akuzat të pakuptueshme, jam i pafajshëm
• Prokuroria Speciale rëndon akuzat për Thaçin, Veselin, Krasniqin e Selimin