Kryetari i Lëvizjes Vetëvendosje, Albin Kurti, dhe ai i Lidhjes Demokratike, Isa Mustafa, pritet të takohen sërish sot, në takimin e tretë, në përpjekje për të arritur një marrëveshje për formimin e qeverisë së re të Kosovës.
Pas kthimit në tavolinën e bisedimeve dy ditë më parë, palët kanë përafruar pozicionet, duke dhënë sinjale shpresëdhënëse për arritjen e koalicionit.
Ndërkohë, në mesnatë ka kaluar “koha shtesë” prej 48 orësh, që presidenti i Kosovës, Hashim Thaçi i kishte dhënë kreut të Vetëvendosjes së Albin Kurtit për të propozuar zyrtarisht mandatarin për formimin e qeverisë së re.
Zgjedhjet e përgjithshme parlamentare të Kosovës, të cilat u zhvilluan me 6 tetor u panë si një sukses për demokracinë politike.
Kur kanë kaluar disa muaj nga ky moment, partitë fituese në Kosovë nuk kanë gjetur ende gjuhën e përbashkët për formimin e qeverisë së re.
Kjo situatë e paqartë ka shtuar mosbesimin tek elektorati, ndërsa nuk kanë munguar akuzat e ndërsjella mes partive fituese dhe atyre që dolën në opozitë pas votës së qytetarëve në muajin tetor.
