Presidenti i Kosovës, Hashim Thaçi dhe ai i Serbisë, Aleksandër Vuçiç janë takuar mbrëmë në Shtëpinë e Bardhë me ftesë të të dërguarit special për dialogun ndërmjet Kosovës dhe Serbisë, Richard Grenell.
Pas nisjes së tij për Kosovë, Presidenti Thaçi ka konfirmuar takimin duke shprehur gatishmëri për raportim të asaj se çfarë është diskutuar gjatë qëndrimit të tij në Shtetet e Bashkuara të Amerikës, e veçanërisht lidhur me takimin me presidentin serb.
“Pres që menjëherë, të mërkurën apo të enjten, të më mundësohet raportimi në Kuvendin e Republikës së Kosovës, për t’i njoftuar deputetët dhe qytetarët e Kosovës për takimet në Uashington dhe më specifikisht për takimin e sotëm,” citohet Thaçi në njoftimin e presidencës.
Thaçi poashtu ka vënë theksin edhe në rëndësinë e unifikimit të qëndrimeve në spektrin e brendshëm politik.
“Duke qëndruar të bashkuara institucionet, partitë politike dhe qytetarët, Kosova do të jetë edhe më e forte,” ka thënë ai.
Sipas Presidentit Thaçi, Kosova është e bekuar me mbështetjen e Amerikës dhe Presidentit Trump.
Presidenca e Kosovës ka njoftuar se i pranishëm në takim ishte edhe Këshilltari për Siguri Kombëtare, Robert O’Brien. Presidenti serb gjatë qëndrimit të tij në Shtetet e Bashkuara të Amerikës ka paralajmëruar vazhdimin e fushatës për çnjohjen e Kosovës.
Vuçiç ka deklaruar se Beogradi do të kërkojë çnjohjen e Kosovës, derisa njohja nga Serbia për Kosovën nuk do të ndodh.
“Mos e kërkoni njohjen sepse ne nuk do ta bëjmë këtë”, citohet të ketë thënë Vuçiç.
Mediat kanë raportuar se ai është I gatshëm të rinis dialogun në momentin që do të hiqet tarifa 100% ndaj produkteve serbe.