Ministrja e Drejtësisë, Etilda Gjonaj ka reaguar pas deklaratës së presidentit të republikës, Ilir Meta i cili në një konferencë për mediat pak më parë e akuzoi ministren për shpërdorim detyre dhe paralajmëroi se, brenda ditës së hënë do të depozitojë pranë SPAK kallëzim penal për të.
Duken e cilësuar si përgjegjëse për grushtin e shtetit të organizuar sipas tij, ndaj institucionit të presidentit, kreu i shtetit i kërkoi ministres të japë dorëheqjen nga detyra.
Por menjëherë pas kësaj deklarate ka reaguar vetë ministrja e Drejtësisë, e cila përmes një postimi në Twitter e quan një marrëzi të radhës kallëzimin penal ndaj saj, ndërsa i kujton presidentit se ka në dorë vetëm dorëheqjen e tij dhe të askujt tjetër.
[twitter_feed=https://twitter.com/GjonajEtilda/status/1230856885772988416]
“E përshëndes Presidentin që pas disa shfaqjesh publike pa ekuilibër etik, ka zgjedhur t’i drejtohet SPAK me një kallëzim penal për mua; një marrëzi e radhës po të paktën në rrugë institucionale, madje drejt një institucioni të dalë nga Reforma që ai lufton pa fre!
Jam e gatshme t’i përgjigjem ligjërisht, me të gjithë përgjegjësinë po edhe me krenarinë që i përkas Frontit të Reformës në Drejtësi, denigruesit botërisht të njohur të kësaj reforme jetike! Sa për dorëheqjen zotëria ka në dorë vetëm të tijën dhe të askujt tjetër”, – shkruan ministrja Gjonaj në Twitter.
