Ndryshe nga sa bëri një vit më parë, Presidenti Meta ka dekretuar hyrjen në fuqi të buxhetit për vitin 2020. Në një njoftim për shtyp, zyra e Presidencës bëri me dije se kreu i shtetit e ka marrë këtë vendim me shumë rezerva, por ka hedhur firmën për të mos vonuar marrjen e masave për përballimin e pasojave të tërmetit të 26 nëntorit.
“Presidenti i Republikës, për të mos penguar zbatimin e masave të menjëhershme që lidhen me riparimin e pasojave të shkaktuara nga tërmeti i datës 26 nëntor 2019, ka dekretuar pa vonesë ligjin nr. 88/2019 “Për buxhetin e shtetit për vitin 2020”, shkruhet në njoftimin e Presidencës.
Nga shqyrtimi i dokumentacionit, Presidenti liston një sërë vërejtjesh ndaj ligjit për buxhetin e vitit 2020, ku si pikë kryesore ka rritjen ekonomike.
“Nga shqyrtimi i ligjit, Presidenti ka konstatuar shumë problematika dhe konkretisht: Rritja ekonomike është ngadalësuar në vitin 2019, në një mesatare për 2.8% për nëntë mujorin, krahasuar dhe me rritjen e rishikuar nga Ministria e Financave prej 3.4%”, shkruhet më tej.
Në dhjetorin e vitit 2018, kreu i shtetit vendosi të kthente për rishqyrtim në Kuvend buxhetin e vitit 2019, nën argumentin që në ligjin fiskal të parashikoheshin edhe kërkesa e studentëve, të cilët në muajin e fundit të vitit 2018 protestuan në rrugët e Tiranës.
