Ministrja e Arsimit Evis Kushi deklaroi për Euronews Albania se orët mësimore në shkollat që janë me turne do të jenë 30 minuta dhe jo 45 minuta.

“Në ato klasa, shkolla ku mësimi do të jetë me turne, ora mësimore do të jetë 30 minuta. Por, dua ta theksoj se ora e reduktuar kompensohet me numrin e reduktuar të nxënësve”, u shpreh ministrja.

Znj. Kushi theksoi se gjatë këtij viti shkollor do të ketë mësim me turne për shkak të situatës me pandeminë.

“Përsëri do të ketë mësim me dy turne, por është një mënyrë, një masë që do ta marrim për të mbrojtur shëndetin e nxënësve, mësuesve dhe komunitetit”, tha ajo.

Ministrja shtoi se edhe këtë vit shkollor të gjithë arsimtarët do të paguhen për orët shtesë.

Ajo përmendi edhe mësimin plotësues ku tha se ka një program për të dhe se shkollat kanë vepruar edhe në bazë të nevojave të tyre specifike.