Kryetari i Listës Serbe, Goran Rakiç deklaroi se nëse konfiskohen automjetet e serbëve në Kosovë, të cilat nuk janë regjistruar me targat RKS deri më 1 nëntor, do të bllokojnë rrugët në veri.

Deklaratën, Rakiç e dha pas një takimi të shkurtër që pati me presidentin serb, Aleksandër Vuçiç, shkruan Euronews Serbia.

“Ne i thamë qartë presidentit Vuçiç dhe kërkuam që nëse Forcat e Sigurisë së Kosovës, policia apo dikush tjetër fillon të konfiskojë pronën tonë, dhe pasuria jonë përfshin ato targa dhe ato automjete, ne do të përdorim të gjitha mjetet dhe do të bëjmë rezistencë në mënyrë demokratike dhe paqësore. Do të jetë rezistenca e popullit”, tha ai.

Takimi mes përfaqësuesve të Listës Serbe dhe presidentit Vuçiç, vjen pesë ditë para se të skadojë afati për riregjistrimin e makinave në Kosovë.

Më 31 korrik dhe 1 gusht serbët lokalë në veri të Kosovës kanë vendosur barrikada si shenjë pakënaqësie ndaj vendimit të qeverisë së Kosovës për zbatim të dy vendimeve: për targat e makinave dhe dokumentet serbe.

Vendimi për zbatim të këtyre dy vendimeve është shtyrë për 1 shtator, edhe me kërkesë të mekanizmave ndërkombëtarë.

Ndërkohë është arritur marrëveshje për dokumentet për hyrje/dalje. Kosova dhe Serbia zhvillojnë dialog për normalizimin e raporteve që nga viti 2011.

LEXONI GJITHASHTU

• ‘Po u digjen shtëpitë’, Osmani: Qytetarët po kërcënohen për targat
• Vuçiç mbledh sot Këshillin e Sigurisë Kombëtare, do diskutohet për Kosovën
• Escobar: Shpresoj se Prishtina të pranojë shtyrjen e afatit për targat