Kryeministri i Shqipërisë, Edi Rama duke përshëndetur vendimin e kryeministrit të Kosovës, Albin Kurti për heqjen e taksës 100% me Serbinë, deklaron se kjo taksë ka dëmtuar reputacionin ndërkombëtar të Kosovës. Z. Rama në reagimin e tij nuk ka lënë pa sulmuar ish-kryeministrin e Kosovës, Ramush Haradinaj.

“Me paturpësi Ramushi ka nisur baltosjen e Albin Kurtit! Albini mund të jetë gjithçka po kurrë nuk është shërbëtor i Serbisë! Uroj të mos tutet prej sulmeve të ulëta për heqjen e taksës që shkatërroi reputacionin ndërkombëtar të Kosovës dhe viktimizoi Serbinë në sytë e botës! Kurrë nuk është dëgjuar një idiotësi më e madhe se sa predikimi që taksa do sjellë njohjen e Kosovës nga Serbia dhe asgjë s’i ka bërë më shumë dëm Kosovës, se sa ajo taksë e kthyer nga një thirrje për vëmendje ndaj shkeljeve të CEFTA-s nga Serbia, në një litar në fytin e Kosovës”, shprehet Rama.

Kryeministri i Shqipërisë më tej tha se, “Albin Kurti është në rrugën e duhur! Heqja e taksës do jetë dita e parë e tij si kryeministër në zyrë, jo më si lider opozite në zyrën e kryeministrit! Do t’i duhet të përballet me etiketën e “tradhtarit” po ani, ajo etiketë i dallon udhëheqësit e paqes nga statujat e luftës”.