Gregory Kehoe, avokati i ish-presidentit të Kosovës, Hashim Thaçi thotë se fillimi i procesit gjyqësor ndaj Thaçit dhe ish-luftëtarëve të tjerë të UÇK-së po vonohet për shkak të prokurorisë.
Në një intervistë për Kosova Press, Kehoe u shpreh se prokuroria nuk po i ofron mbrojtjes të gjitha provat shfajësuese.
Sipas tij, gjykata duhet t’i refuzojë dokumentet që Zyra e Prokurorit të Specializuar i merr nga Serbia dhe shtoi se e kjo e fundit ka qenë historikisht e përfshirë në fabrikimin e dëshmive dhe dëshmitareve.
“Procesi nuk po fillon sepse Prokurori nuk ka qenë i gatshëm ta fillojë atë. Nëse ju kujtohet, në nëntor të vitit 2020, Prokurori pat thënë se është i gatshëm të fillojë gjyqin për gjashtë muaj. Kjo ndodhi para gati dy viteve që kur ai e bëri këtë koment, dhe akoma nuk është i gatshëm. Ata nuk kanë bërë gjithçka që duhet të bëjnë, sipas rregullave, prandaj është vonuar”, theksoi ai.
Hashim Thaçi, Jakup Krasniqi, Kadri Veseli dhe Rexhep Selimi po mbahen në paraburgim nga nëntori i vitit 2020.
Aktakuza ndaj tyre lidhur me pretendimin për krime lufte, është konfirmuar më 26 tetor 2020.
Më 29 prill 2022, Zyra e Prokurorit Special ka dorëzuar aktakuzën e ndryshuar kundër Thaçit, Veselit, Selimit dhe Krasniqit. Në këtë aktakuzë të re, Prokuroria Speciale ka rënduar akuzat ndaj katër ish-zyrtarëve të lartë të Ushtrisë Çlirimtare të Kosovës.
LEXONI GJITHASHTU