Shqipëria po kalon një periudhë të shtuar të virozave respiratore dhe duket se është në prag të epidemisë gripale.
Me anë të një komunikimi për mediat, drejtoresha e ISHP-së, Eugena Tomini, ka bërë më dije se shifrat e të infektuarve janë rritur ndjeshëm dhe tashmë kemi një qarkullim intensiv të viruseve në popullatë.
“Kemi bashkëqarkullim të virozave respiratore, me predominim të virusit të gripit. Qarkullojnë virusi i gripit A dhe B, RSV (virusi respirator sincicial) dhe Covid-19. Popullata është vaksinuar në një përqindje të lartë, dhe grupet e riskut janë të vaksinuara. Por, grupet e riskut që ende nuk e kanë kryer vaksinimin, duhet të vaksinohen. Po ashtu, nëse keni shenja gripi, qëndroni në shtëpi, mbani kontakt me mjekun e familjes dhe me mjekun specialist”, tha Tomini.
Nisur nga kjo situatë, Tomini ka apeluar për vijimin e vaksinimit dhe kujdes të shtuar.
“Kemi rreth 23 mijë infeksione respiratorë të sipërme dhe të poshtme; theksojmë se vaksinimi në kohë është i rëndësishëm”, tha ajo.
Deri më tani, sipas ISHP-së, janë shpërndarë rreth 76% e vaksinave anti-grip në popullatat e riskut.
Tomini i rekomandoi qytetarëve që të kontaktojnë mjekun e familjes ose specialistin për diagnozë dhe trajtim të duhur.
LEXONI GJITHASHTU:
- Shqetësimi mjekëve në Gjirokastër: Qytetarët kërkojnë barna pa recetë kundër gripit
- Situata e gripit, ministrja Koçiu: Ka shtim të rasteve, por nuk jemi në epidemi