Shpenzimet buxhetore do të rriten me gati 20 miliardë lekë, ndërkohë që të ardhurat do të ulen me po atë vlerë. Një akt normativ i datës 21 mars ndyrshon përbërjen e buxhetit për 2020-ën, me qëllim përballimin e situatës së krijuar nga COVID-19.
Në 19 mars kryeministri deklaroi planin e tij ekonomik prej 23 miliardë lekësh të cilat do shpërndahen në funksion të secilës prej 7 pikave të planit, për përballimin e vështirësive që biznesi dhe qytetarët po kalojnë për shkak të mbylljes së aktiviteteve.
Fondi rezervë bëhet 9.2 miliardë lekë. Ky fond do përdoret nga këshilli i ministrave si kontigjencë dhe për raste emergjencash që mund të krijohen nga koronavirusi i ri.
Defiçiti do rritet me 30 miliardë lekë, ose 3.9% e prodhimit kombëtar. Ndërsa borxhi publik do rritet me mbi 37 miliardë lekë. Në aktin normativ vlera limit për marrjen e një eurobondi rritet për herë të tretë duke marrë një vlerë mbi 80 miliardë lekësh.
Sipas Ministrisë së Financave, parashikimi për rritjen ekonomike përgjysmohet, duke shkuar në 2%.
