Qeverisja elektronike (e-government) pa dyshim që lehtëson kostot e shërbimeve, pakëson radhët e gjata për qytetarin dhe largon sekserin publik ose privat nga qytetari.
Kryeministri Rama në Forumin Ekonomik të Tiranës, edicioni i dytë deklaroi se brenda këtij viti 95 përqind e shërbimeve të administratës shtetërore do të jenë elektronike. Mirëpo teknologjia e informacionit në vetvete nuk është një ilaç kundër korrupsionit.
“Nokia po mundëson pajisje për lidhjet e shpejta, ky është plani jonë. Po mundësojmë pajisje për internet të shpejtë, për në shtëpi, por edhe për qeveritë. Ne kemi shumë zgjidhje për të ofruar për projektet shqiptare”, është shprehur drejtori i Zyrës së Nokia-s për Evropën Olivier Duroyon.
Mirëpo ka raste kur teknologjia e informacionit nuk e kufizon dot, madje nganjëherë e bën më të lehtë për shkelësit e ligjit të kryejnë korrupsion.
Mungesa e dukshmërisë së sistemeve të IT-së mund të jetë në avantazh të abuzuesve, sidomos në të dhënat komplekse të prokurimeve publike.
Në shërbimet elektronike publike, janë të njohura tashme rastet e korrupsionit në sistemin TIMS të kontrollit kufitar, në sistemin elektronik të prokurimit publik dhe në IT-në e Operatorit Shtetëror të Shpërndarjes së Energjisë.
Rëndësia e masave mbrojtëse të forta kundër abuzuesve dhe krimit kibernetik del një domosdoshmëri. Një problematike e tille doli qartë edhe në panelin e Forumit Ekonomik të Tiranës dedikuar zgjidhjeve digjitale për qytetet shqiptare.
