Pas gati dy orësh ndërhyrje aktive e strukturave të emergjencës dhe banorëve të zonës është shuar vatra e zjarrit në Kordhocë, Gjirokastër.

Zjarri u shfaq fillimisht në një zonë me shkurre dhe më pas të ndihmuara nga era flakët u përhapën në një sipërfaqe të gjerë duke rrezikuar banesat në Lazarat. Në vendngjarje krahas zjarrfikësve të Gjirokastrës ndërhynë edhe automjete dhe efektivë zjarrfikës të ardhur nga Tepelena, Përmeti dhe Dropulli si dhe struktura të Bashkisë Gjirokastër dhe vullnetarë.

Ndërhyrjen për vendosjen nën kontroll të flakëve e vështirësonte terreni i thyer dhe shpërthimi i municioneve të braktisura, të ngelura nga trazirat e vitit 1997. Aktualisht vatra e zjarrit është shuar duke dëmtuar vetëm sipërfaqe me shkurre. Në zonë është stacionuar një grup zjarrfikësish për monitorimin apo riaktivizimin e mundshëm të flakëve.

Dyshohet se zjarri mund të jetë shkaktuar nga një masë elektrike. Organet ligjzbatuese po punojnë për zbardhjen e shkaqeve të zjarrit i cili rrezikoi edhe banesat.

LEXONI GJITHASHTU:

• Zjarri rrezikon banesën në Derviçan, ndërhyjnë zjarrfikësit
• Gjirokastër rritet numri i zjarreve , Shërbimi Zjarrfikës gjobit zjarrvënësit