Spajiç reagon ndaj akuzave në media: Asnjë negociatë për qendrat e emigrantëve në BE

Kryeministri i Malit të Zi, Milojko Spajiç, reagoi sot ndaj raportimeve të medias në lidhje me listën e supozuar paraprake të vendeve ku Bashkimi Evropian mund të krijojë qendra për migrantët, ku supozohet se përfshihet edhe Mali i Zi. Spajiç deklaroi se qeveria e tij nuk do ta pranonte një propozim të tillë.

“Dua të deklaroj qartë se Mali i Zi nuk është angazhuar në negociata për krijimin e qendrave të tilla në territorin e tij, dhe as Qeveria nuk ka marrë një iniciativë zyrtare për hapjen e tyre – dhe kur kjo iniciativë të jetë në tryezë, përgjigjja jonë do të jetë negative”, shkroi Spajić në X.

Ai shtoi se Mali i Zi mbetet një partner i besueshëm i Bashkimit Evropian në mbrojtjen e kufijve të përbashkët, si dhe në menaxhimin e lëvizjeve migratore.

“Megjithatë, çdo vendim që ka të bëjë me vendin tonë do të merret në mënyrë të përgjegjshme, transparente dhe ekskluzivisht në përputhje me interesat e qytetarëve të Malit të Zi”, shkroi Spajić.

Më 3 gusht, Euronews raportoi se qeveria e Italisë po planifikon t’i paraqesë BE-së një plan për të ngritur qendra të reja kthimi, bazuar në modelin e Shqipërisë, në vende të treta të sigurta.

“Një listë fillestare përfshin disa shtete afrikane dhe disa vende të vendosura jashtë rrugëve tradicionale të migrimit. Kandidatët potencialë përfshijnë Ganën, Senegalin, Tunizinë, Libinë, Mauritaninë, Egjiptin, Ugandën, Etiopinë, Uzbekistanin, Armeninë dhe Malin e Zi”, thuhet në artikull.

Artikulli vëren, megjithatë, se diskutimet në lidhje me Malin e Zi “mbeten në një fazë paraprake”.