Për juristin Sokol Hazizaj zhvillimet e vitit që lamë pas në sistemin e drejtësisë për sa i takon krijimit të organeve të reja janë pozitive. Por është skeptik për kohën se kur do vijnë rezultatet konkrete nga Prokuroria dhe Gjykata Speciale.

Kjo për shkak të vonesës trevjeçare në ngritjen e tyre.

“Do të japë rezultatet e veta jo sot, sepse edhe kjo kërkon një standard. Standardin e hetimit, pra krijimin e organit të ri që është Byroja Kombëtare e Hetimit, mënyra e funsionimit të tij dhe ngritja e strukturës.  Pra, sërish rezultati është ende në pikëpyetje. Kështuqë rezultatet pozitive do të jënë në kohë tjetër, duhen jo më pak se tre vjet të tjera”-tha ai.

Një tjetër problem sipas Hazizajt janë kompetencat e strukturës që do hetojë korrupsionin dhe krimin e organizuar.

“Mori nga Gjykata e Krimeve të Rënda thujase të njejtën lëndë, në 90 për qind të saj. Që do të thotë se mbeten shumë çështje në Gjykatën dhe në Prokurorinë e Posaçme. Nuk po them për karakterin kushtetues ose jo të tyre, por po them si materie që do ngelet në këto gjykata. A do ta vështirësojnë këto, sepse janë të njëjtat çështje, në hetim dhe në gjykim. Normalisht e vonojnë procesin dhe risinë për të cilin u ngritën këto organe”-theksoi Hazizaj.

Dhe e gjithe kjo situatë duket se do ketë kosto në shërbimin ndaj qytetarëve.

“Nuk shtrohet problemi këtu që a u dënua politikani apo jo, këtu problemi është i shërbimit dhe shërbimi që është shërbimi gjyqësor (gjykata) ka filluar të japë defektet e veta, që do të thotë se nuk ofrohet i njëjti shërbim”- pohoi juristi.

Juristi shton se largimi i gjyqtarëve dhe prokurorëve nga vettingu ka sjellë si pasojë pamundësinë e institucioneve të reja Keshilli i Lartë gjyqesorë dhe ai  Prokurorisë për t’i zevëndësuar. Rezultati në këtë rast është mungesa e Gjykatës Kushtetuese dhe asaj të Lartë si dhe ka vënë në vështirësi Gjykatat e Apelit.