Të dhënat e fundit nga autoritetet shëndetësore në Spanjë vazhdojnë të tregojnë një rënie të rasteve të reja dhe viktimave nga coronavirus në vend.

Numri i rasteve të reja shënon një rënie për të katërtën ditë radhazi çka le të nënkuptohet se masat strikte të distancimit social po nisin të shfaqin efektet e tyre pozitive.

Qytetarët vijojnë ende të infektohen dhe të vdesin nga virusi, por me një ritëm më të ngadaltë krahasuar me javën e shkuar.

Numri i rasteve të konfirmuara ka rënë në shifrën 4,273, raportuan autoritetet shëndetësore të hënën, në krahasim me më shumë se 6 mijë raste gjatë së dielës dhe mbi 7 mijë të shtunën.

Numri i viktimave nga coronavuris në 24 orët e fundit gjithashtu ka pësuar rënie për ditën e tretë radhazi, 637 viktima pohuan autoritetet, në krahasim me 674 të dielën dhe 809 të shtunën.

Ndërsa numri total i viktimave është mbi 13 mijë.

Ndërkohë, 2,357 persona janë shëruar nga virusi duke e çuar totalin në mbi 40 mijë.