Kryeministri spanjoll Pedro Sánchez fitoi mbështetjen e deputetëve për të formuar një qeveri me koalicion të majtë.

Votimi i jep fund një ngërçi politik  që zgjat prej rreth një viti.  Ashtu siç pritej, rezultati i votimit ishte, shumë i ngushtë me 167 vota pro koalicionit dhe 165 kundër.

Kryeministri në detyrë fitoi kryesisht falë 18 abstenimeve.  

Partia më e madhe separatiste katalonjase premtoi se do të abstenonte, në këmbim të bisedimeve për krahinën autonome në të ardhmen.

Sánchez dhe Pablo Iglesias, që drejton partinë e të majtës radikale Unidas Podemos (Të Bashkuar Ne Mundemi), kanë ritheksuar qëllimet e tyre për të formuar qeverinë e parë me koalicion në Spanjë.

Kjo është qeveria e parë me koalicion në Spanjë, që nga tranzicioni i saj në demokraci pas regjimit të Francisco Francos.

Pas javë të tëra negociatash, që nga zgjedhjet e fundit të nëntorit, Sanchez ka mbledhur mbështetjen e mjaftueshme – ose premtimet për abstenim – nga në grup i vogël partish rajonale për të marrë pushtetin.

Kërkesa katalanase për pavarësi e ka çuar Spanjën drejt krizës më serioze politike prej dekadash.

Mbreti Felipe VI i kërkoi Sanchez të formojë qeverinë pas zgjedhjeve të 10 nëntorit, kur socialistët morën shumicën e votave, por fituan vetëm 120 vende në Dhomën e Deputetëve prej 350 vendesh.

Sanchez dhe lideri i Podemos Pablo Iglesias thanë se duan të rrisin pagat minimale, tatimin mbi të ardhurat për ata që fitojnë më shumë si dhe mbrojtjen e të drejtave të grave dhe emigrantëve.

Në vitet e fundit, në politikën spanjolle kanë sunduar socialistët dhe Partia Popullore. Por kjo nisi të ndryshojë pas krizës financiare të kohëve të fundit në Europë, e cila i dha jetë partive të reja politike, duke përfshirë dhe Unidas Podemos dhe së fundmi edhe partia e ekstremit të djathtë Vox, tashmë grupi i tretë parlamentar më i madh në Spanjë.

Krahas bisedimeve me separatistët katalanas, sfida e parë e Sanchez do  të jetë miratimi I buxhetit të 2020-s në parlament.