Në vitin 2015 qeveria vendosi që shërbimi i sterilizimit të pajisjeve kirurgjikale të mos ofrohej nga vetë spitalet, por të kalohej me koncension.
Kështu me datë 10 dhjetor 2015, Ministria e Shëndetësisë, ka lidhur një kontratë koncesionare 10-vjecare me kompaninë “Sani Service”.
Kontrata ishte planifikuar të zgjaste për një periudhë 10-vjeçare, me një vlerë fillestare të parashikuar prej 9.6 miliardë lekësh.
Por, në vitin 2018, shpenzimet për shërbimet e sterilizimit të personalizuar të pajisjeve kirurgjikale të kryera nga partneriteti publik-privat ishin 2 miliardë lekë, ose 28.3 për qind më shumë se plani prej 1 miliard e 560 milionë lekësh, që ishte programuar në buxhetin e vitit 2018.
Për këtë arsye, Ministria e Shëndetësisë ngriti një grup pune në datë 25 shkurt 2019 me mjekë specialistë për rishikimin e seteve kirurgjikale.
E gjitha kjo me qëllim uljen e numrit e mjeteve kirurgjikale në çdo set dhe në këtë mënyrë ulej edhe të kostot financiare.
Nga ana tjetër në dhjetor të vitit 2019, nisma “Thurje” bëri një kallëzim penal për zyrtarët publik të përfshirë në koncesionin e sterilizimit të pajisjeve kirurgjikale, të cilët mund të kenë abuzuar me to.
“Euronews Albania” kontaktoi Ministrinë e Shëndetësisë për një reagim të këtij kallëzimi, për të cilën SPAK nisi hetimet, por ministria në përgjigjen e saj tha se sa kohë çështja është në proces institucioni nuk prononcohet.
Padia e Nismës “Thurje” ishte padia e parë që ka kaluar në Prokurorinë e Posaçme Anti-korrupsion. Ajo u depozitua në datën 23 dhjetor të 2019, tre ditë pas themelimit të SPAK-ut.
Mjeku urolog, Artan Koni, i cili ishte personi i parë që denoncoi çështjen e “Sterilizimit” u pyet dje nga prokurorët e SPAK, ndërsa tha se deklaratat e tij kishin për qëllim të ndihmonin prokurorët për të kuptuar mënyrën e llogarive dhe kostot financiare në këtë sektor.
