Shqipëria ka hartuar të parën strategji ndërsektoriale për mbrojtjen e viktimave të krimit e cila synon fuqizimin viktimave të veprave penale, duke garantuar mbështetje, mbrojtje dhe një mjedis të sigurt, në mënyrë të tillë që ato të raportojnë krimin.

Projekt-akti për miratimin e kësaj strategjie me plan veprimi në vitet 2024-2030, i propozuar nga Ministria e Drejtësisë, është hedhur për konsultim publik.

Ky dokument politik i qeverisë shqiptare synon përafrimin e legjislacionit me standardet e Bashkimit Europian si pjesë e procesit të integrimit të vendit tonë në BE.

Një vëmendje e shtuar në këtë strategji është hartimi i një programi për kompensimin e viktimave të krimit të trafikimit dhe dhunës seksuale nga autori i veprës penale ose shteti, krijimin e  fondit të përgjithshëm të kompensimit, ekzekutimin e vendimeve të formës së prerë për kompensimin viktimave, monitorimin e procesit të kompensimit të viktimave në praktikë.

Strategjia është angazhimi i parë i qeverisë shqiptare, i cili “targeton viktimat e veprave penale në tërësi dhe viktimat me nevoja specifike mbrojtjeje, duke i kushtuar një vëmendje të veçantë mbrojtjes dhe garantimit të të drejtave të viktimave të krimit në një sistem drejtësie penal të aksesueshëm, transparent dhe efiçent që mbron të drejtat e njeriut sipas standardeve evropiane”.

Parimet si dhe të drejtat bazë lidhur me të cilat udhëhiqet kjo strategji janë e drejta për informacion, e drejta për mbështetje dhe mbrojtje, në përputhje me nevojat individuale të viktimave dhe një sërë të drejtash procedural.

LEXONI GJITHASHTU:

• Pas protestave masive, Bullgaria ndryshon ligjin për mbrojtje nga dhuna në familje
• Dhuna barbare në Krujë, Gjykata vendos masën e sigurisë për 4 të arrestuarit