Ishte një turne që shtroi një terren të ri. Kupa e parë e Botës për femra e mbajtur për herë të parë në këtë kontinent do të bëjë që si fituesit edhe Australia me Zelandën e Re të mbahen mend për pritjen e pabesueshme deri në gjysmëfinalen që shënoi një rekord në shikueshmërinë televizive këtu në Australi. Ne folëm ekskluzivisht me presidentin e FIFA-s, Gianni Infantino dhe e pyetëm për trashëgiminë e këtij kampionati…

“Jam jashtëzakonisht i lumtur dhe shumë krenar. Kjo Kupë Bote për femra ishte më e mira e të gjitha kohërave. Atmosfera ishte fantastike; në stadiumet e mbushura, në rrugë, kudo. Njerëzit ishin të lumtur. Australia dhe Zelanda e Re kanë qenë dy vende pritëse fantastike. Kishim 2 miliardë teleshikues dhe 2 milionë spektatorë në stadiume. Shumë rekorde u thyen. Rezultate që nuk prisnim u arritën. Patëm 8 elementë të rinj, një kampion të ri bote. Çfarë doni më shumë?”, tha Gianni Infantino, president i FIFA-s, në një intervistë për Euronews.

Sam Ashoo, Euronews, Sidnej: Në këndvështrimin tuaj, cila është trashëgimia e këtij turneu?

Sinkron Gianni Infantino, president i FIFA-s: Mendoj se kjo Kupë Bote për femra ka pasur një efekt transformues në shoqëri, si në Australi edhe në Zelandën e Re. Këtë më thonë njerëzit që kam takuar. Edhe globalisht, njerëzit po e shohin futbollin e femrave në një mënyrë komplet tjetër pasi për shumë njerëz ishte ndoshta hera e parë që e panë dhe konstatuan se ishte një event sportiv i madh, me sportiste të mira, të afta dhe me kapacitete taktike, por edhe me shumë emocion dhe pasion. Njësoj si për burrat. Pa harruar atmosferën e gëzuar. Ndaj mendoj se kushdo që sheh futbollin e femrave, tani e sheh atë në një mënyrë tjetër. Kjo është pikërisht ajo që ne donim të arrinim dhe që këtej do të lëvizim në nivelin tjetër.

Sam Ashoo, Euronews, Sidnej: Në këtë pikë, nisur nga rekordet e thyera që kemi parë në këtë kompeticion, a mendoni se do të vijë një kohë kur shikueshmëria e kampionatit të femrave do të barazojë atë të Kupës së Botës për meshkuj?

Sinkron Gianni Infantino, president i FIFA-s: Mendoj se e ardhmja i përket futbollit të grave. Këtu nuk bëhet fjalë për marketing dhe as për lojëra fjalësh. Janë vetë faktet dhe shifrat që e tregojnë këtë. Dhe, siç e dini, gjysma e popullsisë së botës janë gra. Ndaj është e natyrshme që ky fenomen të rritet dhe të prosperojë. Dhe, dua ta theksoj, jo të gjitha kompeticionet për meshkuj mund të konkurrojnë me Kupën e Botës për femra. Ndaj, duke filluar nga kjo, mendoj se është hapur rruga që ky event të bëhet po aq i madh sa Kupa e Botës për meshkuj.

Presidenti i FIFA-s është i vendosur sa i takon të ardhmes së futbollit femëror. Prej këtej duket se ky turne ka ndryshuar mentalitetin për sportin. Vendi ku do të luhet Kupa e ardhshme e Botës duhet ende të caktohet, por shumë vende kanë dalë vullnetare dhe pritshmëritë janë që 2027-a të jetë një event edhe më i madh se ai që pamë këtu në Australi dhe Zelandën e Re….

LEXONI GJITHASHTU:

• Spanja fiton Kupën e Botës në futboll për femra
• Kreu i Federatës Spanjolle të Futbollit kërkon falje për puthjen në buzë të lojtares