Armando Sadiku është rikthyer në kombëtaren shqiptare, ndërsa ka marrë një thirrje nga tekniku Sylvinho. Braziliani ka publikuar mesditën e së shtunës listën e lojtarëve të gatshëm për dy përballjet kualifikuese të Europianit të 2024 ndaj Moldavisë dhe Ishujve Faroe. Plot 27 futbollistë janë në dispozicion të brazilianit për të arritur rezultat pozitiv në këto dy ndeshje decisive sa i përket rrugëtimit drejt Europës.

Risia e kësaj liste janë rikthimi i Sadikut, thirrja e Simon Simonit apo konfirmimi i Andi Hadroj, me këtë të fundit i vetmi lojtar i preferuar nga Superliga Shqiptare. Në portë janë 4 emra, si Strakosha, Berisha, Kastrati dhe Simoni. Në repartin difensiv janë rikthyer dyshja Gjimshiti-Ismajli që munguan ndaj Polonisë për shkak dëmtimi, si dhe thirrja e Bajramit. Risi është Mario Mitaj, mbrojtësi i kombëtares U-21.

Ofensiva e kuqezinjve është plotësuar me rikthimin e dyshes Muçi-Sadiku, në mbështetje të katër lojtarëve të tjerë Uzuni, Asani, Cikalleshi e Seferi. Më 5 qershor trajneri Sylvinho do të zhvillojë konferencën për mediat në lidhje me listën e lojtarëve dhe dy përballjet e radhës, ndërsa më 12 qershor skuadra do të jetë e plotë në Tiranë. Më 17 qershor ora 20:45 Shqipëria përballet me Moldavinë në Air Albania, ndërsa 3 ditë më pas në transfertë ndaj Ishujve Faroe.