Kryeministri Edi Rama ka zhvilluar një takim këtë të mërkurë me drejtuesit e rinj politikë të qarqeve të Partisë Socialiste.
Gjatë fjalës së tij, Rama u shpreh se partia duhet të ndahet nga e shkuara, ku forca politike shihej si një hapësirë për vende pune në sektorin shtetëror.
Sipas Ramës, sfidat e drejtuesve të rinj janë zgjedhjet e ardhshme lokale, por edhe transformimi i partisë.
“Sot ne kemi të zgjedhur për të drejtuar partinë në prag dhe drejt një sfide të rëndësishme si ajo e zgjedhjeve të ardhshme, që janë vitin e ardhshëm, zgjedhjet vendore. Një sfidë edhe më të rëndësishme sipas meje, të transformimit hap pas hapi të partisë në diçka tjetër, që t’i përgjigjet kohës së re që jetojmë, ndryshimeve të rëndësishme që ndodhin në mënyrë të vazhdueshme dhe një nevoje të jashtëzakonshme për të mbajtur sa më pranë njerëzit që na kanë besuar.
Një kohë të re për diçka të ndryshme edhe në sensin e largimit sa më shumë nga ai aksi tmerrësisht i vjetër dhe shumë e konsumuar, i një partie të dedikuar si një hapësirë ku disa ankohen se duan punë në shtet, disa kërkojnë punë në shtet. Kjo duhet të jetë e shkuara. Partia duhet të mobilizojë forcat që të jetë një parti zëdhënëse e shumicës qeverisëse në territor, që të jetë një parti ndërmjetëse midis shumicës dhe zgjedhësve dhe parti llogarikërkuese”, theksoi kreu i qeverisë.
LEXONI GJITHASHTU