Lufta për territor ka përfshirë 60 bletërritës të fshatit Rrëmenj në Pogradec. Prej vitesh, në kohën që lulëzon gështenja, bletërritësit e Elbasanit sjellin kosheret për kullotë në gështenjat e Rrëmenjit.

“Bletët që sjellin nga zona të tjera i kanë të fuqishme dhe i sulmojnë bletët tona. Na kanë dëmtuar jashtëzakonisht. Ne me bletë mbahemi, do bëjmë protestë ose do të shkojmë në vetëgjyqësi”, shprehet një banor.

Bletërritësit e Rrëmenjit, kanë dërguar një peticion në Bashkinë e Pogradecit, ku kanë kërcënuar se do të vazhdojnë me bllokime rrugësh, nëse nuk zbatohen të drejtat e tyre dhe të mos cenohet distancA prej 3 kilometrash nga kullota, të cilën bletërritësit e Elbasanit e shkelin.

“Jemi ankuar në bashki, ka një muaj. Por sërish vijnë hyjnë me forcë. Do të mblidhemi të bëjmë vetëgjyqësi se nuk kemi rrugë tjetër. Policia na vjen neve sikur i kërcënojmë. Ne kemi marrë kërcënime, jo ata”, shprehet një protestues.

“Ne prej gështenjave i mbajmë bletët po edhe atë mjaltë po kërkojnë të na e marrin bletët e Elbasanit. Jemi ankuar tek institucionet, por nuk po i japin dot drejtim”, tha një tjetër banor.

Pas dhjetëra ditësh kërkesa, vetëm ditën e sotme në terren kanë dalë specialistët e shërbimit veterinar, të cilët po shohin nga afër situatën.