Një 41-vjeçar është arrestuar nga policia e Tiranës për 4 vjedhje të dokumentuara në stacionet e autobusëve dhe në rrugëkalimet e këmbësorëve.

Policia ka ndarë dhe pamjet kur ky person kryente vjedhjet e portofolave dhe celularëve duke qëndruar në stacionët e autobusit në qendër të kryeqytetit.

Shtetasi A. P., 41 vjeç, banues në Tiranë, rezulton një person i dënuar më parë për vjedhje.

Materialet procedurale në ngarkim të tij i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

“Shërbimet e Komisariatit të Policisë Nr. 3, në vijim të punës për garantimin e sundimit të ligjit në territor, goditjen e veprimtarive kriminale në fushën e vjedhjes së pronës dhe pasurisë, si rezultat i administrimit të menjëhershëm të kallëzimeve të qytetarëve të ndryshëm, për raste të vjedhjes së portofolave dhe celularëve të tyre, në disa stacione autobusi, me mbështetjen e inteligjencës policore, kanë organizuar dhe finalizuar operacionin policor të koduar “Stacioni”.

Si rezultat u kap dhe u vu në pranga shtetasi A. P., 41 vjeç, banues në Tiranë, i dënuar më parë për vjedhje.

Nga veprimet hetimore ka rezultuar se 41-vjeçari iu vidhte shtetasve të ndryshëm, celularët dhe portofolat, në stacionet e autobusëve dhe në rrugëkalimet e këmbësorëve. Nga veprimet hetimore ka rezultuar se ky shtetas, gjatë ditëve të fundit, ka vjedhur 3 celularë dhe 1 portofol”, thuhet në njoftimin e policisë.

LEXONI GJITHASHTU: 

• Lë makinën ndezur në oborrin e banesës, hajdutët futen dhe e vjedhin
• Grabitje me dhunë në një dyqan celularësh në Tiranë, largohet autori