Deputetja e Lidhjes Demokratike të Kosovës, Vjosa Osmani është zgjedhur kryetare e Kuvendit të Kosovës. Ajo ka pasuar në këtë post Glauk Konjufcën nga Lëvizja Vetëvendosje, i cili ishte zgjedhur kryetar i Kuvendit më 26 dhjetor, 2019.
Bazuar në marrëveshjen për koalicion qeverisës të arritur ndërmjet Lëvizjes Vetëvendosje dhe Lidhjes Demokratike të Kosovës, Konjufca ka kaluar në pozitën e ministrit të Jashtëm të Kosovës, ndërsa Osmani ka marrë pozitën e kryetares së Kuvendit.
Në seancën për zgjedhjen e kryetares së Kuvendit nuk kanë marrë pjesë partitë opozitare, Partia Demokratike e Kosovës, Aleanca për Ardhmërinë e Kosovës dhe Nisma Socialdemokrate.
Vjosa Osmani është gruaja e parë që zgjidhet në krye të Kuvendit të Kosovës.
38 vjeçarja e lindur dhe e rritur në Mitrovicë, do të udhëheq këtë institucion pjesë e të cilit, si deputete ishte për tri mandate.
Para se të bëhej deputete, Osmani ishte këshilltare e presidentit të Kosovës, Fatmir Sejdiu.
Osmani ka studiuar për psikologji dhe mban gradën doktor në shkenca juridike në SHBA.
Njohëse e pesë gjuhëve të huaja Osmani, ka të publikuara libra punime shkencore që mbajnë emrin e saj.
Ajo është e martuar dhe nënë e dy vajzave.
Kujtojmë që me 66 vota pro, 10 abstenim dhe asnjë kundër Kuvendi i Kosovës miratoi qeverinë e re, të drejtuar nga Albin Kurti, lider i Lëvizjes Vetëvendosje.
Pak para votimit, partitë opozitare, Partia Demokratike e Kosovës, Aleanca për Ardhmërinë e Kosovës dhe Nisma Socialdemokrate u larguan nga salla duke mos marrë pjesë në votim.
