Qytetarët e Kazakistanit po votojnë në një referendum kushtetues për të cilin presidenti Qasym-Zhomart Toqaev ka thënë se do ta zhvendosë vendin nga një “formë superpresidenciale e qeverisjes në një republikë presidenciale me një parlament të fortë”.
Referendumi i 5 qershorit për rreth 56 ndryshimet e propozuara në Kushtetutë vjen pasi vendi u trondit nga trazirat vdekjeprurëse në janar, që i dhanë fund kontrollit të gjatë në pushtet të presidentit të parë të Kazakistanit, Nursultan Nazarbaev.
Kundërshtarët e qeverisë i kishin bërë thirrje Toqaevit të shtynte referendumin, duke thënë se njerëzve nuk u ishte dhënë kohë e mjaftueshme për të studiuar propozimet.
Për t’u miratuar referendumi, më shumë se 50 përqind e votuesve në të paktën 12 nga 17 rajonet e vendit duhet të votojnë në favor të amendamenteve.
Ndryshimet do ta ndalojnë presidentin e vendit të jetë anëtar i një partie politike gjatë kohës që mban postin. Të afërmit e presidentit nuk do të lejohen të mbajnë asnjë post kyç në sektorin publik.
Kjo masë shihet si një përpjekje për të parandaluar thellësinë e pabesueshme të nepotizmit që ndodhi nën udhëheqjen e Nazarbaevit.
Nazarbaev, 81 vjeç, dhe të afërmit e tij të ngushtë do të humbnin gjithashtu imunitetin e tyre të përjetshëm nga ndjekja penale nëse referendumi miratohet.
LEXONI GJITHASHTU:
- 225 të vdekur nga protestat në Kazakistan
