KESH dhe OSHEE mbi 680 milionë euro borxhe

Kompanitë publike të sektorit të energjisë elektrike, KESH dhe OSHEE kanë në bilancet e tyre mbi 680 milionë euro borxhe. Shanset që këto kompani të shlyejnë detyrimet ndaj njëra-tjetrës dhe shtetit, në këtë periudhë krize janë të pakta, duke shtuar rrezikun që barra të rëndojë mbi taksapaguesit.

Sektori energjetik rrezikon të kthehet në flluskën e radhës financiare pasi detyrimet e kompanive publike kanë shkuar në 680 mln euro, me rritje edhe pas vitit 2018. 

3 vite më parë, OSHEE dhe KESH zgjidhën me marrëveshje çështjen CEZ, nga ku lindi detyrimi 423 mln euro që operatori i shpërndarjes duhet t’i paguajë korporatës për 29 vite. Deri në fund të vitit 2020, OSHEE pagoi 23 mln euro, duke e ulur detyrimin në 400 milionë euro. Por, një dokument i siguruar nga Euronews Albania, tregon se borxhi gjatë kësaj periudhe u rrit për shkaqe të tjera me 34 mln euro.

Kjo shumë, përfshirë edhe kamatë-vonesat është krijuar për mospërmbushje pagesash të energjisë elektrike të shitur në vitet 2018-2019. Nga ana tjetër, KESH i detyrohet 52 mln euro OSHEE-së, për mospërmbushje të kontratave të shërbimit publik në 2019 dhe 2020.

Të varura nga tekat e motit dhe kreditë e huaja që janë marrë për investime, kompanitë përballen edhe me pamundësinë e pagesës së detyrimeve që kanë ndaj buxhetit të shtetit, e që arrijnë në 290 mln euro, si taksa të papaguara dhe kredi të mbuluara nga buxheti.

Në përballjen me krizën e re që ka sjellë çmimi i energjisë në bursa, përpos 200 milionë eurove që do të marrë nga qeveria, OSHEE-së i duhet të mbledhë faturat e papaguara nga ujësjellësit dhe entet publike, që arrijnë160 mln euro për të lehtësuar financat e veta.