Detajet e debatit Le Pen – Makron për zgjedhjet në Francë

Emanuel Makron dhe Marine Le Pen do të përballen kokë më kokë në debatin e së mërkurës mbrëma, që mund të rezultojë jetikë në bindjen e votuesve të pavendosur, 4 ditë përpara raundit të dytë të zgjedhjeve presidenciale.

Përballja e gjatë 2 orë e gjysmë, që është përplasja e vetme direkte mes dy kandidatëve, është kthyer në një traditë e fushatës presidenciale që prej vitit 1974, shpesh herë duke i dhënë drejtim procesit elektoral.

Debati do të nisë në 21, me orën lokale. Ai do të transmetohet direkt në 2 kanalet televizive kryesore të Francës, publik dhe privat, si dhe në stacionet informative.

Gjasat janë që ai të tërheqë një audiencë prej miliona shikuesish, nisur nga debati i 2017-s që tërhoqi mbi 16 milionë spektatorë, dhe çdo aspekt i tij është përgatitur me kujdes, me detajet e pranuara nga të dyja palët.

Dy kampet kanë caktuar secili ‘producentë konsultativë’, që do të jenë në studio dhe do mund të ndërhyjnë nëse shohin se kandidati përkatës ndodhet në dizavantazh.

Palët kanë rënë gjithashtu dakord për sfondin e skenës ku do të mbahet debati dhe për distancën prej 2.5 metrash që do të mbahet mes kundërshtarëve. Ndërkohë, temperatura në studio do të jetë 19 gradë Celsius.

Skenari parashikon që Le Pen të flasë e para, ndërsa Makron të thotë fjalën e fundit. Debati do të trajtojë 8 çështje, që janë:

Kostoja e jetesës; politikat sociale për pensionet dhe shëndetësinë; ambienti; ekonomia; arsimi; rendi dhe ligji; emigracioni dhe reforma institucionale.

LEXONI GJITHASHTU:

• Zgjedhjet presidenciale, francezët në pritje të debatit Macron-Le Pen