Bota | Lajmi i fundit

Seul: Ndalen përpjekjet për arrestimin e presidentit pas konfrontimeve

3 Janar 2025 | 11:59

Hetuesit jugkoreanë ndaluan përpjekjet e tyre për të arrestuar presidentin Yoon Suk Yeol në rezidencën e tij më 3 janar lidhur me shpalljen e gjendjes së luftës, duke u thirrur në shqetësime të sigurisë pas një konfrontimi me ekipin e tij të sigurisë.

Yoon, i cili veçse është pezulluar nga detyrat e tij të presidentit pas një votimi të ligjvënësve, do të bëhej presidenti i parë në detyrë në historinë e Koresë së Jugut që do të arrestohej nëse do të zbatohej fletarrestimi.

Avokati i Yoon-it e quajti urdhrin e arrestit “të paligjshëm dhe të pavlefshëm,” duke kërcënuar me veprime ligjore ndaj përpjekjeve për ta ndaluar atë.

Rreth 2,700 oficerë policie janë vendosur për të ruajtur rendin përreth rezidencës.

Presidenti, i cili më 3 dhjetor 2024 njoftoi për shpalljen e gjendjes së luftës njoftim që tronditi demokracinë e Azisë Lindore dhe për një kohë të shkurtër riktheu në shtet sundimin ushtarak, përballet me shkarkim, ose në skenarin më të keq, me dënim me vdekje.

“Sa i përket ekzekutimit të fletarrestimit sot, u vendos se ekzekutimi do të ishte i pamundur për shkak të përplasjes së vazhdueshme”, tha përmes një deklarate Zyra për Hetimin e Korrupsionit, që po heton Yoonin lidhur me vendimin e tij për gjendjen e luftës.

“Shqetësimet për sigurinë e personelit në terren çuan deri te ndalja e vendimit” për përpjekjet për arrestim, u tha në deklaratë, ku u shtua se ka pasur konfrontim me shërbimin presidencial të sigurisë së Yoonit dhe njësisë së tij ushtarake.