Instituti Nobel refuzon propozimin e Machados për të ndarë Çmimin e Paqes me Trump

Organizatorët e Nobel për Paqen kanë thënë se çmimi nuk mund të revokohet, ndahet ose transferohet pasi udhëheqësja e opozitës së Venezuelës, Maria Corina Machado kërkoi që ta ndante atë me presidentin amerikan, Donald Trump.

Trump nuk e ka mbajtur të fshehtë dëshirën e tij të fortë për t’u vlerësuar me Çmimin Nobel për Paqen, fituesi i të cilit zgjidhet nga një komitet i pavarur prej pesë anëtarësh në Oslo.

Pasi SHBA-të nisën sulmet ajrore dhe një bastisje në Venezuelë që çuan në kapjen e Nicolas Maduro, Machado javën e kaluar deklaroi se donte ta ndante me Trump çmimin në emër të popullit venezuelian.

“Ajo që ai ka bërë është historike. Është një hap i madh drejt një tranzicioni demokratik”, shtoi ajo.

Komiteti Norvegjez i Çmimit Nobel dhe Instituti Norvegjez i Nobelit kanë lëshuar një paralajmërim që tregon se një transferim i tillë i çmimit nuk do të ishte i mundur.

“Faktet janë të qarta dhe të përcaktuara mirë”, thanë ata në një deklaratë. “Sapo shpallet një çmim Nobel, ai nuk mund të revokohet, ndahet ose transferohet te të tjerët. Vendimi është përfundimtar dhe vlen përgjithmonë’, thanë ata.

“Asnjë nga komitetet e ndarjes së çmimeve nuk e ka konsideruar ndonjëherë tërheqjen e një çmimi Nobel. Në parim, Komiteti Norvegjez i Nobelit nuk komenton kurrë për atë që thonë ose bëjnë laureatët e çmimit të paqes pasi u është dhënë çmimi,” shtuan ata.