Britania e Madhe ndihmë për sigurinë kibernetike në Bosnje dhe Hercegovinë

Specialistët ushtarakë të Mbretërisë së Bashkuar do të dërgohen në Bosnje dhe Hercegovinë për të përforcuar misionin e NATO-s dhe për të promovuar stabilitetin dhe sigurinë në vend, lajmi është bërë me dije nga qeveria britanike.

Bosnja dhe Hercegovina aktualisht po përballet me kërcënimin më të madh ekzistencial në periudhën e saj të pasluftës, me liderë  që punojnë aktivisht për të krijuar përçarje  dhe konflikte.

“Ne nuk mund të lejojmë që Ballkani Perëndimor të bëhet një tjetër shesh i lojërave për synimet shkatërruese të presidentit rus, Vladimir  Putin. Duke ndezur flakët e përçarjes, Rusia përpiqet t’i kthejë mbrapsht sukseset e tri dekadave të fundit në Bosnje-Hercegovinë, cka ka sjellë stabilitet në të gjithë kontinentin. Ndaj kjo është arsyeja që ne po forcojmë mbështetjen për Bosnje-Hercegovinën”, thuhet në deklaratën e kryeministrit britanik, Boris Johnson.

Me kërkesë të selisë së NATO-s në Sarajevë, një ekspert ushtarak britanik kundër dezinformimit dhe një këshilltar civil i mbrojtjes strategjike do të vendosen për të mbështetur dhe trajnuar Forcat e Armatosura të Bosnjes dhe Hercegovinës.

Përveç kësaj, Mbretëria e Bashkuar do të sigurojë 750,000 paund për të krijuar një qendër të sigurisë kibernetike brenda Universitetit të Sarajevës. Kjo do të forcojë mbrojtjen e Bosnjës dhe Hercegovinës kundër sulmeve kibernetike, të cilat mund të dëmtojnë njerëzit brenda dhe jashtë vendit.

Mbretëria e Bashkuar ka një angazhim të gjatë për paqen dhe sigurinë në rajon, duke filluar nga  vitet 1990 kur ushtarët britanikë u bënë  pjesë integrale e përpjekjeve humanitare gjatë Luftës së Bosnjës.

Trupat e Mbretërisë së Bashkuar i kanë shërbyer vazhdimisht Bosnjë Hercegovinë, duke e ndihmuar në rindërtimin, mbrojtjen dhe promovimin e paqes.

Shqetësimet e Perëndimit për Bosnje-Hercegovinën janë shtuar qëkur Rusia nisi pushtimin e Ukrainës më 24 shkurt.

LEXONI GJITHASHTU:

• Johnson: S’mund të lejojmë që Ballkani të bëhet shesh lojërash për Putin
• Inteligjenca amerikane: Putin, synim të pushtojë pjesën më të madhe të Ukrainës