Edi Rama sqaron në Euronews Albania qëndrimin e kandidates Luljeta Bozo për diktaturën

Kryeministri Edi Rama ka sqaruar në emisionin “Me pak Fjalë” në Euronews Albania qëndrimin e tij në lidhje me diktaturën komuniste dhe debati që nxiti deklarata e kandidates për deputete Luljeta Bozo.

Rama i tha analistit Neritan Sejamini se është “antikomunist dhe antifashist”. Ai këmbënguli se në rastin e kandidates Bozo deklarata rreth vlerësimit si “me më shumë anë pozitive se sa negative” të diktaturës, ishte “e nxjerrë nga konteksti”.

“[…] mendoj se është nxjerrë jashtë kontekstit për arsye se zonja Luljeta [Bozo] po fliste për profesionalizmin, për profesionistët, shkencëtarët, shkencën e tjerë-e tjerë, dhe besoj që referenca e saj lidhej me këtë fakt, nuk lidhej me asnjë prirje për të amnistuar krimet e komunizmit, gjë të cilën ajo pastaj e tha shumë qartë edhe vetë që ‘nuk më shkon ndërmend që të mendoj se mund të amnistohen krimet e komunizmit’ – u shpreh Rama.

I pyetur nëse i dënon krimet e komunizmit, Rama tha me krenari se “PS është partia që ka bërë ligjin për hapjen e dosjeve” duke nënkuptuar se “dënimin e krimeve” e ka bërë me këtë qasje politike.

“Mendoj që antikomunizmi i vërtetë dhe produktiv në këtë fazë të historisë sonë pas shembjes së komunizmit është pikërisht të bëjmë të gjitha ato reforma dhe transformime të cilat e vënë frymën e antikomunizmit si frymë lirie në themelin e mënyrës së funksionimit të shtetit, institucioneve të shoqërisë sonë,” – u shpreh Rama.

“Unë jam antikomunist dhe jam antifashist… pra unë jam socialist, i rrugës së tretë,” – këmbënguli në fund kryeministri në detyrë.

LEXONI GJITHASHTU:

• ‘Shumë borxhe, pak rrugë’, Sejamini pyet kryeministrin Rama pse e ka shtrënguar dorën tek infrastruktura
• Rama dhe Sejamini debatojnë për largimin e investitorëve të huaj nga Shqipëria
• Koalicionet paszgjedhore, Rama: Partitë janë bërë të gjitha bashkë kundër PS