Farmacia online, Amazon hap dyqanin e saj për medikamente

Kolosi i shitjeve Amazon.com ka hapur një farmaci online, përmes të cilës klientët e tij do të mund të porosisin medikamente, që do t’u mbërrijnë me postë brenda pak ditësh.

Farmacia e Amazon ofron një gamë ilaçesh që variojnë nga kremrat dhe tabletat, deri tek ato që duhet të qëndrojnë në frigorifer, si insulina.

Për të blerë duhet vetëm që klientët të kenë një profil në Amazon dhe që mjeku i tyre t’i dërgojë recetat atje.

“Amazon do të marrë pjesën dërrmuese të sigurimeve. Por edhe ata që nuk janë të siguruar, por janë anëtarë të opsionit “Prime” të Amazon do të mund të përfitojnë ulje të çmimit të ilaçeve në këtë faqe dhe ta përdorin këtë anëtarësi për të përfituar ulje të çmimeve edhe në farmacitë fizike në thuajse 50 mijë lokalitete të SHBA”, komenton Joseph Pisani, analist ekonomie, Associated Press.

Zinxhirët e mëdhenj farmaceutikë bazohen kryesisht tek dyqanet e tyre për të pasur një fluks të qëndrueshëm klientësh.

Ato i kanë shërbimet e internetit, por Amazon e ka perfeksionuar këtë opsion dhe dyqani i saj online është shumë i madh.