Fituesja e Nobelit, Narges Mohammadi në grevë urie në paraburgim në Iran

Fituesja e Çmimit Nobel për Paqen, Narges Mohammadi, është në grevë urie ndërsa po mbahet në paraburgim nga autoritetet iraniane, sipas një deklarate nga fondacioni i saj.

Në deklaratën e ndarë ekskluzivisht me CNN, fondacioni thotë se ka marrë informacion të besueshëm se Mohammadi filloi grevën e saj të hënën për të protestuar kundër ndalimit të saj të paligjshëm dhe kushteve të tmerrshme në të cilat po mbahet, realitete me të cilat përballen shumë të burgosur politikë që mbahen aktualisht në Iran.

Ali Rahmani, djali i Mohammadi-t, tha në një deklaratë se ishte thellësisht i shqetësuar për nënën e tij dhe të gjithë të tjerët të ndaluar nga regjimi.

“Ajo që po ndodh në vendin tonë është një krim kundër njerëzimit”, tha Rahmani, duke shtuar se para arrestimit të saj, nëna e tij bënte thirrje për solidaritet, unitet dhe paqe.

Mohammadi u arrestua në dhjetor nga forcat e sigurisë dhe të policisë gjatë një ceremonie përkujtimore për Khosrow Alikordi, një avokat dhe aktivist i të drejtave të njeriut i cili u gjet i vdekur në zyrën e tij.

Ajo u arrestua në Mashhad, qytetin e dytë më të madh të Iranit. Fondacioni tha se për shkak të problemeve shëndetësore të Mohammadit, paraburgimi i saj është jashtëzakonisht i rrezikshëm dhe shkelje e ligjeve të të drejtave të njeriut.

Fondacioni tha se laureatja e Çmimit Nobel për Paqen ka pasur gjithashtu qasje të kufizuar në familjen e saj dhe ka pasur vetëm një telefonatë me vëllain e saj më 14 dhjetor, pa asnjë kontakt që atëherë.