”Google” akuzohet se fshiu fotot e Çërçill gjatë protestave kundër racizmit

Protestat e fundit kundër racizmit çuan në rrëzimin e statujave të ish tregtarëve të skllevërve në SHBA e Britani, si dhe të mbretit belg, Leopold II.

Disa protestues nuk donin të kursenin as kryeministrin e djathtë britanik, Uinston Çërçill, i cili udhëhoqi vendin gjatë Luftës së Dytë Botërore kundër Gjermanisë naziste.

Por këto ngjarje ngritën edhe një debat tjetër. Grupi i djathtë britanik, që favorizon daljen nga BE-ja, “Leave.eu”, akuzoi kompaninë “Google”, motorin më të madh në botë për kërkimin në internet, se kishte fshirë foton e Çërçillit nga rezultatet që dalin po të kërkosh me termin “lista e kryeministrave britanikë”.

Postimi u bë menjëherë viral dhe ngjalli diskutime të shumta nëse Google e kishte zgjedhur vërtet të fshinte foton e  Çërçillit duke lënë ato të Adolf Hitlerit.

Për “Leave.eu”, kjo ishte një fushatë e organizuar për të ndotur imazhin e kryeministrit historik të Mbretërisë së Bashkuar.

Ndërsa politikani amerikan, republikani Devin Nunes, arriti deri aty sa të thotë se të gjitha fotot e Çërçillit ishin fshirë nga faqja e dheut.

Google reagoi me një postim të gjatë në Twitter. Ata dshpjeguan se gjatë muajit prill, kompanisë i kishin bërë vërejtje se fotoja që kishin përdorur për kryeministrin britanik nuk ishte e saktë.

Fotoja që ishte zgjedhur nga sistemi automatik i Google ishte e Çërçillit kur ishte në moshë shumë të re, dhe nuk ngjante me kohën kur ishte kryeministër.

Google e ka zgjidhur problemin duke angazhuar këtë herë redaktorë njerëzorë, jo robotë kompjuterikë, të cilët vendosën foton e saktë.

Kompania tha se gjëra të tilla normalisht ndreqen shpejt, por një defekt në sistem nuk e kishte lejuar ngarkimin e fotos.