I etiketoi si vrasës dhe konkurrent të ashpër, Biden fton Xi dhe Putin në Samitin e Klimës

Presidenti i Shteteve të Bashkuara, Joe Biden ka ftuar liderët e Kinës dhe Rusisë për bisedime mbi çështjen e ndryshimeve të klimës.

Nga Shtëpia e Bardhë, Biden tha se nuk ka folur me presidentët Xi dhe Putin, por sipas tij, ata e dinë që janë të ftuar.

“Nuk kam folur me asnjë prej tyre individualisht, por ata e dinë që janë të ftuar. Sapo zhvillova një bisedë telefonike me kryeministrin britanik, ndërsa të enjten fola me të gjithë liderët e vendeve anëtare të BE-së. Por me ata jo”, tha Biden.

Nga ana e tyre, presidentët Xi dhe Putin nuk kanë reaguar ende, por marrëdhëniet e tyre me administratën e re amerikane mbeten të tensionuara, për shkak të sanksioneve dhe pasi Biden etiketoi presidentin rus si vrasës.