Irani sekuestron anijen-cisternë në ngushticën strategjike

Trupat e Gardës Revolucionare Iraniane kanë sekuestruar një anije-cisternë të huaj në Ngushticën e Hormuzit, duke rikthyer tensionet në rajon.

Mjeti lundrues po transportonte rreth 4 milionë litra karburant kontrabandë kur u lokalizua, bëri të ditur një zyrtar i Ministrisë së Drejtësisë, i cituar nga agjencia e lajmeve “IRNA”.

Autoritetet ndaluan 16 anëtarët e ekuipazhit, por nuk bënë publike kombësitë e tyre dhe as flamurin me të cilin udhëtonte anija-cisternë.

Irani sekuestron herë pas here anije në kalimin strategjik detar nën dyshimin e kontrabandës. Në nëntor, trupat ushtarake të Republikës Islamike sekuestruan një tjetër mjet që po përshkonte ngushticën, me argumentin se kishte kryer shkelje.

Një e pesta e naftës që tregtohet në nivel global dhe çereku i naftës së nxjerrë nga deti kalojnë ngushtica e Hormuzit.

Teherani zyrtar ka paralajmëruar vazhdimisht se do të bllokojë kalimin, ndërkohë që flota e pestë e Marinës Amerikane, me bazë në Bahrein, vijon të jetë e pranishme për t’u siguruar që aksi të jetë i hapur.

Tensionet mes Republikës Islamike dhe Perëndimit janë përshkallëzuar në vitet e fundit. Uashingtoni e akuzon Teheranin për sulme të qëllimshme ndaj cisternave në vitet 2019 dhe 2021, që kanë vrarë edhe dy shtetas evropianë.

Incidentet pasuan tërheqjen e Shteteve të Bashkuara nga marrëveshja bërthamore e vitit 2015, gjatë mandatit të parë të presidentit Trump.