Kostot në arbitrazh, Çela: Problem Avokatura e Shtetit dhe pandëshkueshmëria

Burimet njerëzore në avokaturën e shtetit dhe mosndëshkimi i personave përgjegjës janë sipas gazetares së OCCRP, Lindita Çela, dy nga problemet kryesore të shteti Shqiptar lidhur me paditë në gjykatat ndërkombëtare të arbitrazhit dhe të drejtave të njeriut.

Gjatë një interviste për emisionin “Me Pak Fjalë”, gazetarja shprehu opinionin e saj në lidhje me hapat që duhen marrë për të shmangur raste si Becchetti ku shteti duhet të paguajë 110 milionë euro për sekuestrim të paligjshëm të aseteve.

Çela tha se një nga problemet kryesore është avokatura e shtetit dhe se ajo duhet fuqizuar menjëherë.

“Avokatura e shtetit po kthehet në kosto pasi ka krijuar kosto për shtetin në gjykatat e arbitrazhit”, deklaroi ajo.

“Së dyti shteti shqiptar duhet të gjejë përgjegjës dhe të dënojë ata që kanë nënshkruar dokumentat e falsifikuara.”, shtoi gazetarja e OCCRP.

Çela nënvizoi se mos ndëshkueshmëria e askujt që ka krijuar kosto për buxhetin që vjen nga taksat e qytetarëve ka dëmtuar Shqipërinë në proceset ndërkombëtare.

“Në kohën kur prokuroria por përpiqej të çonte cështjen në gjykatë, ka pasur në vitinn 2015-2016 një vendim të shtetit shqiptar pro Beketit. Duket se nga një anë shteti e sulmon publikisht ndërsa nga ana tjetër e kanë përdorur duke marrë para ose në rastin më të keq që të paguajmë para për shkak të kryeministrave të këtij vendi.”, tha Çela.