Rama dhe Sejamini debatojnë për largimin e investitorëve të huaj nga Shqipëria

Kryeministri Edi Rama tha në emisionin “Me pak Fjalë” në Euronews Albania se investimet e huaja janë rritur në Shqipëri, pavarësisht se disa kompani kanë ndërruar zotërues vitet e fundit.

Analisti Neritan Sejamini i përmendi Ramës faktin se gjatë viteve të fundit kompani serioze të njohura në botë janë larguar nga sektorë të rëndësishëm të Shqipërisë si sektori bankar, sektori i hidrokarbureve, sektori i komunikacionit, apo dhe hotelerisë.

Mirëpo kryeministri theksoi për të kundërtën duke këmbëngulur se sipërmarrja e tyre u është kaluar investitorëve të tjerë.

“Jo! S’janë larguar nga Shqipëria, janë të gjitha sipërmarrje që janë kaluar te investitorë të tjerë,” – u shpreh Rama duke u ndalur në disa raste të kalimeve të aksioneve.

Sipas kryeministrit “totali i investimeve të huaja është rritur, nuk është ulur”. Sejamini ndërhyri duke thënë se ky kalim aksionesh është kryer me investitorë “ose lokal, ose lindorë”, por Rama citoi së paku dy sipërmarrje me emra të njohur, si ato të sektorëve të aviacionit, apo e automobilave.

“Keni rreth 300-400 të rinj dhe të reja që kanë mbaruar IT që marrin paga super te ‘Air Albania Stadium’, […] janë punonjës shqiptar që japin solucione [zgjidhje] për Lufthansa Solutions,” – u shpreh Rama.

Përballë këmbënguljes së Sejaminit, se “raste të tilla përdorin thjesht krahun e punës” dhe “nuk krijojnë investime”, Rama u përgjigj me siguri se bilanci i investimeve të huaja mbetet në rritje.

LEXONI GJITHASHTU:

• ‘Shumë borxhe, pak rrugë’, Sejamini pyet kryeministrin Rama pse e ka shtrënguar dorën tek infrastruktura
• Rama dhe Sejamini debatojnë për largimin e investitorëve të huaj nga Shqipëria
• Koalicionet paszgjedhore, Rama: Partitë janë bërë të gjitha bashkë kundër PS
• Edi Rama sqaron në Euronews Albania qëndrimin e kandidates Luljeta Bozo për diktaturën