Shefi i grupit mercenar Wagner, Yevgeny Prigozhin, ka mbrojtur praktikën e ndjekur prej tij për të rekrutuar të dënuar për të luftuar në Ukrainë.

Në një deklaratë të publikuar nga shërbimi i tij i shtypit, Prigozhin tha se mbi 5.000 të burgosur janë falur dhe u janë kthyer jetës civile pasi kanë shërbyer për gjashtë muaj në luftë.

Sipas tij, më pak se 1 për qind e tyre kanë kryer ndonjë krim tjetër në muajin e parë pasi janë kthyer në Rusi.

“Kemi reduktuar krimin në Rusi”, pretendoi Prigozhin.

Grupi i Wagner rekrutoi me mijëra burra nga burgjet në Rusi të cilët i çoi për të luftuar në Ukrainë dhe si “shpërblim” u dha lirimin nga dënimi i marrë.

Prigozhin muajin e kaluar tha se Wagner më nuk do të rekrutojë të burgosur, ndërkaq Ministria ruse e Mbrojtjes raportohet se ka nisur fushatën e vetë të rekrutimit në burgjet ruse.