Sekuestrimi i anijes cisternë, Egjipti i kërkon Iranit të lirojë katër personat e ndaluar

Egjipti deklaroi të mërkurën se po punon për të siguruar lirimin e katër qytetarëve që u ndaluan nga Irani muajin e kaluar pasi Teherani sekuestroi një tanker të huaj. Në një deklaratë, ministria e jashtme egjiptiane tha se katër anëtarë të ekuipazhit egjiptian ndodheshin në bordin e anijes Reem alKhaleej në portin Bandar Abbas të Iranit.

Irani tha muajin e kaluar se kishte sekuestruar një anije cisternë të huaj që transportonte 4 milionë litra karburant të kontrabanduar pranë ishullit iranian Qeshm në Gjirin Persik. Irani nuk zbuloi kombësinë e personave, por tha se 16 anëtarë të huaj të ekuipazhit ishin ndaluar për akuza penale.

Irani, i cili ka disa nga çmimet më të ulëta të karburantit në botë për shkak të subvencioneve të mëdha dhe një rënie të ndjeshme të vlerës së monedhës së tij kombëtare, është përpjekur të frenojë kontrabandën e përhapur të karburantit nga toka drejt vendeve fqinje dhe nga deti drejt shteteve të Gjirit.