SHBA-ja dhe Irani takohen sot në Oman për bisedime

Zyrtarë e lartë amerikanë dhe iranianë pritet të takohen sot në Oman për bisedime të drejtpërdrejta në orët në vijim, mes një krize që ka rritur frikën e një përballjeje ushtarake midis dy vendeve.

Diskutimet vijnë pas një grumbullimi ushtarak amerikan në Lindjen e Mesme në përgjigje të shtypjes së dhunshme nga Irani të protestave antiqeveritare në të gjithë vendin, të cilat, sipas grupeve të të drejtave të njeriut, vranë mijëra njerëz.

Të dyja vendet mbeten shumë larg në qëndrimet e tyre. Shpresa është që, nëse diskutimet kanë sukses, ato mund të çojnë në një kornizë për negociata.

SHBA-të, të cilat kërkojnë që Irani të ngrijë programin e tij bërthamor dhe të heqë dorë nga rezervat e uraniumit të pasuruar, kishin thënë se bisedimet duhet të përfshijnë edhe raketat balistike të Iranit, mbështetjen e vendit për grupet e armatosura rajonale dhe trajtimin e qytetarëve të tij.

Megjithatë, Irani ka thënë se diskutimet do të kufizohen në programin e tij bërthamor dhe nuk është e qartë nëse këto mosmarrëveshje do të zgjidhen.

Në javët e fundit, Presidenti Donald Trump ka kërcënuar se do të bombardojë Iranin nëse nuk arrin një marrëveshje. SHBA-të kanë dërguar mijëra trupa dhe atë që Trump e ka përshkruar si një “armadë” në rajon, duke përfshirë një aeroplanmbajtëse së bashku me anije të tjera luftarake, si dhe avionë luftarakë.

Irani është zotuar se do t’i përgjigjet një sulmi me forcë, duke kërcënuar se do të godasë asetet ushtarake amerikane në Lindjen e Mesme dhe në Izrael.

Delegacioni iranian do të udhëhiqet nga Ministri i Jashtëm Abbas Araghchi, i cili javën e kaluar tha se forcat e armatosura të vendit të tij ishin “me gishtat në këmbëz”, ndërsa SHBA-të do të përfaqësohen nga i dërguari special Steve Witkoff dhe dhëndri i Trump, Jared Kushner.

Ky do të jetë takimi i parë që përfshin zyrtarë amerikanë dhe iranianë që nga lufta midis Izraelit dhe Iranit qershorin e kaluar, kur SHBA-të bombarduan tre objektet kryesore bërthamore të Iranit.