Sulmet izraelite në Gaza, vriten 9 persona

Nëntë palestinezë humbën jetën pas sulmeve ajrore izraelite në dy zona të ndryshme në Rripin e Gazës. Numri i viktimave u konfirmua nga Shërbimi Palestinez i Mbrojtjes Civile ashtu edhe nga zyrtarët e shërbimit shëndetësor.

Sipas mjekëve, të paktën 4 persona u vranë në një sulm ajror në një kamp ku strehoheshin familje palestineze të zhvendosura.

Në të njëjtën kohë, zyrtarët e shëndetësisë thanë se një tjetër sulm ajror vrau pesë persona të tjerë në Khan Yunis, që ndodhet në jug.

Një zëdhënës i forcave ushtarake izraelite lidhur me sulmet deklaroi se terroristët e Hamasit u bombarduan. Sipas tyre ky ishte një reagim ndaj një shkeljeje që ndodhi të shtunën në Beit Hanoun, ku disa persona dolën nga një tunel në lindje të vijës së verdhë.