Trump: Lufta ndaj Iranit është shërbim ndaj botës, ja sa anije kemi shkatërruar

Presidenti i SHBA-së, Donald Trump, ka bërë deklarata lidhur me luftën kundër Iranit gjatë një aktiviteti në Florida, ku po zhvillon takime me liderë të huaj, duke pretenduar se Shtetet e Bashkuara po arrijnë rezultate “të jashtëzakonshme”.

Trump tha se sulmet amerikane ndaj Iranit kanë dëmtuar rëndë kapacitetet ushtarake të vendit. Sipas tij, marina, forcat ajrore dhe infrastruktura e komunikimeve të Iranit janë goditur ndjeshëm.

Presidenti amerikan deklaroi se forcat amerikane kanë shkatërruar 42 anije të marinës iraniane gjatë ditëve të fundit dhe kanë neutralizuar një pjesë të madhe të fuqisë ajrore dhe sistemeve të telekomunikacionit të vendit.

Ai shtoi gjithashtu se sulmet e mëparshme të SHBA-së kishin në shënjestër objekte të lidhura me programin bërthamor të Iranit, duke pretenduar se Teherani ishte afër sigurimit të një arme bërthamore përpara ndërhyrjes.

Trump e përshkroi operacionin si një sukses të madh dhe tha se sulmet i kanë dhënë një goditje vendimtare kapaciteteve ushtarake të Iranit.

Presidenti amerikan pritet që më vonë të udhëtojë drejt bazës ajrore Dover Air Force Base për ceremoninë e transferimit të nderuar të gjashtë ushtarakëve amerikanë që kanë humbur jetën deri tani në këtë konflikt.

Në deklaratat e tij, Trump tha se lufta kundër Iranit është “një shërbim që po i bëhet botës”, duke shtuar se në një shkallë nga 0 në 10, progresi i fushatës amerikane kundër Iranit është “15”.

Ai u shpreh gjithashtu për personat e vrarë nga sulmet amerikano-izraelite, duke i përshkruar ata si “njerëz të sëmurë, shumë të sëmurë”.