20 të vdekur nga përplasja e një avioni ushtarak në Ukrainë

Të paktën 20 persona raportohet të kenë humbur jetën pas përplasjes së një avioni në Ukrainë.

Lajmi është bërë i ditur nga ministria e brendshme ukrainase, që gjithashtu raportoi për dy persona me lëndime serioze dhe dy të tjerë për të cilët nuk ka informacione.

Në bordin e avionit ndodheshin 24 persona, pilotë të ushtrisë dhe kadetë të Universitetit të Kozhedubit.

Përplasja ka ndodhur rreth orës 20:50 me orën lokale, në qytetin lindor të Çuhuiv (Chuhuyiv), rreth 2 kilometra larg aeroportit ushtarak.

Në vendngjarje u dërguan njësi të ministrisë së Çështjeve të Brendshme dhe skuadra të emergjencës, që ia dolën të shuanin flakët që përfshinë avionin pak para orës 22, referuar kohës lokale.

Avioni i llojit Antonov AN-26 është model me dy motorë i përdorur për fluturime civile dhe ushtarake dhe i fabrikuar në rrethinat e Kievit mes viteve 1969-1986, kohë kur Ukraina ishte pjesë e Bashkimit Sovjetik.