2800 vende pune të humbura, në periudhën korrik-shtator u regjistruan 165 mijë të papunë

Shkalla e papunësisë në tremujorin e tretë të vitit u regjistrua në 11,6%, duke shënuar një ulje me 0.3 pikë përqindje në raport me 3-mujorin e dytë, ku papunësia u fiksua në 11.9%.

Nisur nga shifrat e raportuara nga Instituti i Statistikave, situata reflekton rinisjen e aktivitetit ekonomik, edhe pse sektorë të ndryshëm të biznesit deklarojnë se për shkak të kufizimeve, kanë reduktuar vendet e punës.

Në shifra konkrete, Instituti i Statistikave llogarit rreth 165 mijë persona të papunë, ose 2800 më shumë se periudha 3-mujore para izolimit nga pandemia.

Këto vende pune të humbura llogariten kryesisht në bujqësi e turizëm, dy sektorë diametralisht të kundërt për pasojat që krijoi pandemia, kur i pari thuajse  nuk u prek, ndërsa aktiviteti turistik pësoi krizën më të madhe.

Por ndryshe nga INSTAT, Banka e Shqipërisë referuar te dhënave te mbledhura nga tregjet e punës deklaron se, krahasuar me fundin e vitit 2019, ekonomia shqiptare humbi rreth 50 mijë vende pune, e barasvlershme me një rënie vjetore të punësimit prej 3.6%. Si rrjedhim, norma e papunësisë u rrit në 11.9%.

Një nga arsyet për këtë shifër, që duket se bie ndesh me zhvillimet e tregut të punës, është edhe fakti se INSTAT nuk i liston si të papunë, të vetëpunësuarit dhe ata persona që nuk kanë qenë të punësuar gjatë kësaj periudhe, por që prisnin t’i ktheheshin aktivitetit brenda tre muajsh.

Shkalla e papunësisë (%)

T3 2019                 T4 2019                 T1 2020                 T2 2020                 T3 2020

11.4                        11.2                        11.4                        11.9                        11.6

                                                                                                Burimi: INSTAT

Numri i të papunëve

T3 2019                 T4 2019                 T1 2020                 T2 2020                 T3 2020

163,432                 160,030                 162,041                 166,127                 164, 803

                                                                                                Burimi: INSTAT