3 shkolla në Nju Jork ndalojnë kostumet e “Squid Game” për Hallouin

Kostumet e serialit shumë të ndjekur të Netflix ‘Squid Game’, konsiderohen si veshjet më të përshtatshme për festen e Hallouinit, por jo në tri shkolla në shtetin e Nju Jorkut.

Drejtuesit e shkollave u kanë dërguar nga një e-mail prindërve të nxënësve, duke u shpjeguar atyre urdhrin e shkollës që ndalon kostumet e kuqe me maskat e zeza dhe kjo për shkak të mesazhit jo edukativ që përcjell seriali koreano-jugor.

Vendimi i shkollave erdhi pasi drejtuesit e tyre që janë në zonën e Sirakuz në Nju Jork kishin parë sesi nxënësit po kopjonin skena nga loja e këtij seriali.

“Një kostum Hallouini i frymëzuar nga ky serial nuk përshtatet me rregullat tona dhe për shkak te natyrës dhunuese të lojës, e cilësojmë të papërshtatshëm për këtë festë”, lexohet në e-mailin e drejtuar prindërve të nxënësve.

Seriali me një shikueshmëri të lartë dhe i shumëpërfolur tregon historinë e një grupi personash të cilët rrezikojnë jetën e tyre në një lojë mbijetese për të fituar çmimin prej rreth 33 milionë euro.

Pas debutimit në Netflix, rreth 111 milionë shikues në mbarë botën kanë parë serialin, duke e bërë atë serialin më popullor të platformës por në të njëjtën kohë ka shkaktuar shumë polemika për skenat e dhunshme.