515 mln euro për interesat e borxhit, kostoja e huasë për qeverinë rritet në 2023

Ministria e Financave parashikon që kostoja e borxhit të përgjithshëm për vitin e ardhshëm të rritet me 168 milionë euro më shumë në krahasim me këtë vit.

Sipas parashikimit të paraqitur në relacionin e projektbuxhetit 2023, për pagesa interesash dhe fond kontigjence për risqet e borxhit janë ndarë 61 miliardë lek në total, ose rreth 515 milionë euro.

Shifra është 20 miliardë lek, ose 168 milionë euro më shumë nga parashikimi i kostos së borxhit për këtë vit.

Borxhi i brendshëm do të ketë rritjen më të lartë, duke vijuar me prirjen që ka nisur prej muajsh që këtë vit. Nga të dhënat e Ministrisë së Financave, deri në fund të shtatorit vetëm interesat e borxhit të brendshëm janë rritur me reth 15 milionë euro në krahasim me të njëjtën periudhë të një viti më parë.

Shqipëria ka gati gjysmën e borxhit publik huamarrje të brendshme, ndërsa Ministria e Financave parashikon që vitin e ardhshëm të emëtojë një tjetër Eurobond me vlerë të paktën 500 milionë euro, si dhe një kredi nga Fondi Monetar Ndërkombëtar prej 180 milionë eurosh.

LEXONI GJITHASHTU

• Efektet e rritjes së normave të interesit, kredia shtrenjtohet në nivele rekord
• BSH rrit normën e interesit, Sejko: Inflacioni, kërcënimi kryesor për ekonominë
• A u hakerua sistemi bankar? Flet ekspertja e ekonomisë