Von der Leyen viziton Ballkanin Perëndimor në fund të shtatorit: Sinjal i fortë i angazhimit të BE për procesin e pranimit

Presidentja e Komisionit Europian, Ursula von der Leyen do të vizitojë Ballkanin Perëndimor para fundit të këtij muaji. Njoftimi u bë nga drejtuesja e lartë gjatë fjalimit të sotëm në Parlamentin Europian. Qëllimi është sipas saj, të dërgojë një sinjal të fortë në vendet e rajonit për angazhimin e BE në procesin e pranimit.

“BE-ja dhe Ballkani Perëndimor do të jenë gjithmonë më të fortë së bashku. Para fundit të muajit, do të udhëtoj në rajon për të dërguar një sinjal të fortë të angazhimit tonë për procesin e pranimit. Ua kemi borxh të gjithë atyre të rinjve që besojnë në një të ardhme evropiane”, u shpreh presidentja e Komisionit Evropian.

Sipas znj. Von der Leyen, kjo është arsyeja pse po rritet mbështetja përmes planit të ri ekonomik dhe të investimeve, me vlerë rreth një të tretën e PBB-së së rajonit.

“Sepse një investim në të ardhmen e Ballkanit Perëndimor është një investim në të ardhmen e BE-së”, tha ajo.