Ish-lideri i Katalonjës arrestohet në Sardenjë

Ish-lideri katalanas, Karles Pushdemont, i cili u largua nga Spanja, pas një tentative të dështuar për të shpallur pavarësinë në rajonin separatist në vitin 2017 u ndalua këtë të enjte në Sardenjë të Italisë.

Pushdemont, i cili jeton në Belgjikë dhe mban një vend në Parlamentin Europian, ka kundërshtuar ekstradimin në Spanjë, e cila e akuzon atë dhe liderët e tjerë katalanas për kryengritje.

Avokati i tij, Gonzalo Boye deklaroi se Pushdemont u ndalua në mbërritjen e tij në Sardenjë, ku do të merrte pjesë në një event që zhvillohej këtë fundjavë.

Rrethanat e ndalimit të tij nuk ishin të qarta, edhe pse avokati i tij deklaroi se ish-presidenti rajonal u ndalua për shkak të një urdhër-arresti të lëshuar në vitin 2019.

Ndërkohë, për Gjykatën e Apelit të Sasarit, arrestimi i Pushdemont nuk është i jashtëligjshëm, por nuk ka nevojë të kufizohet në ambientet e paraburgimit. Atij do t’i duhet të qëndrojë në Sardenjë deri në momentin që do të merret një vendim për ekstradimin e tij.